HAJDEMO DRAGA (Alen Polić i „Jabuka“)

NAGRADE NA MIK-u 2010

HAJDEMO DRAGA - Alen Polić i „Jabuka“
(Trad./Ines Prajo – Ines Prajo –Tihomir Petrović)

• NAGRADA «BESEDA»
  
  za cjelokupni izričaj koji na najbolji način promovira naš kraj i njegovu tradiciju
  
  HAJDEMO DRAGA Alen Polić i „Jabuka“
  
  (Trad./Ines Prajo – Ines Prajo –Tihomir Petrović)
  (pokrovitelj: Novi List)

• NAGRADA ZA NAJBOLJI SCENSKI NASTUP:
  
  HAJDEMO DRAGA Alen Polić i „Jabuka“
  (pokrovitelj: Domaći radio)

Alen Polić i VIS Jabuka na MIK-u su ćapali »Besedu« Novoga lista

Koga briga za plasman, glavno da j nan bilo prelipo

300 let su skupa z gramofonon imeli dobitnici nagradi »Beseda« na pasanomu MIK-u.

Zdenka, Dragica, Jurić i Zvone, Alenova kumpanija z MIK-a kuntenta j sen ča njin se na MIK-u strefilo, a strefile su njin se i pobjede i poraz, ma kako bi oni rekli – se j to za ljudi...

Alen Polić, i njegov VIS Jabuka na pasanomu su MIK-u dobili dve nagradi. Onu za scenski nastup ku njin je dal Domaći radijo i »Besedu«, nagradu ku Novi list daje kancone va koj se se potrefi – i zajik, i užanca, i glazba, i tekst, a uza se nabrojano ta kancona mora dihat dihon i navadun kraja va ken je nastala. Se to imela j pjesma »Hajdemo draga« za ku j tradicijski tekst i glazbu obrnula i navrnula Ines Prajo, a aranžman načinil Tihomir Preradović.

Si su ih voleli

Ono ča su Alen i njegove »jabučice« – Zdenka Golik, Dragica Kolombo, Ivan Jurić Polić i Zvonko Kružić načinili na MIK-u to j bilo čudo. Najprvo to ča su skupa z gramofonon ki njin je bil scenski rekvizit imeli preko tristo let, bila j posebnost, a kad su onako šesni zišli na pozornicu, publika bi zajedno počela pljeskat. Kad bi zatancali, pa još i zakantali, publika bi padala va trans. Njin pak nikako ni bilo jasno, ča se to dogaja, pa j pokle trete festivalske večeri i dva osvojena treta mesta gospa Dragica na domjenku va Krku rekla – majko, ča j ovo došli na svit, si okolo nas profesionalci, a mi amateri pobjeđujemo. Jušto radi te njihove iskrenosti i cela jih je karavana volela, si su navijali za nje i bodrili ih i si ih jako štimali. To ča njin je zadnje mesto va Gračišću zapaprilo va ukupnen poretku, pa su na kraju namesto treti ale drugi bili četrti, to njih ne pojida.

– Ma, ča nas briga ki smo, nan je najvažnije da nan je na MIK-u bilo lipo. Čuda toga smo prvi put delali, ne leh to da smo prvi put pivali pred tulikimi ljudimi, prvi put bili kod izvođači na festivalu, nan je na tomu MIK-u bilo puno toga prvi put, rekal nan je Jurić, a teta Zdenka dodala da ona nikad prvo ni šećala Opatijun, bila va Labinu, Rapcu i, kako bi rekla – Gradišću, pa doštukala da ča se tiče Gradišća ni trebela ni sad. Zvone j bil kratak i rekal – meni j sagdi bilo super. Ljudi su nas lipo prijeli, a ako me pitaš kadi mi j bilo najbolje pokle festivala zajedno ću ti reć – na Krku.

Čuda simpatij

Ča se tiče ljudi va karavane Zlobinjari su kuntenti. Se su to dragi i fini ljudići, govore, a saki od njih ima svoga najdražega. Ma oni ki su njin se jače leh drugi va srce zapisali su, kako bi oni rekli – mala Đina, mala Tamara, Dule, Bobušica...

– Super su, moran ti pravit da smo se prvo leh smo krenuli malo i bojali aš si su oni zvjezde, a ča smo mi? Kumpanija Zlobina ka celi život piva ma za se i za svoji. Dočin smo došli na Čavli, na prvu večer, znali smo da će bit se va redu, a te zvjezdi da su normalni ljudi kod i si drugi. Pa ta Karin, to j tako draga ženskica, pa Silvana od Duleta, on z dugimi vlasimi ki j kantal na talijanski, pa on mali Toni ča tako lipo piva, pa dičica od Voljena... I gospodin Ibrica j sasma jednostavan čovik, nabraja Dragica, a Zdenka dodaje – ta karavana, to j čudo. Si se leh buševaju i grle. Jako nan se to lipo videlo. Tr ako ću pravo, ne domislin se kad san se zadnji put toliko buševala. Ma nikada, morda ki put z mužon doklen smo još mladi bili.

Zdenki je najdraži na MIK-u bil Marić. A Marić je zaspraven Mario Battifiaca. Bili smo svjedoki da j to bila ljubav na prvu. Uzajamna. On bi tetu Zdenku saki dan pozdravil z »o, kokić moj, ča još si mi živa«, a ona bi mu odgovorila – črna kugo, ča to govoriš. A onput bi ju Mario zagrlil i bušnul.

Teta Dragica pak poveda da njoj je najteže bilo poć se šminkat, aš da se ni piturala nikada va životu, a na to ča smo njoj mi rekli da j napiturana bila tako lipa i zgodna da j to čudo leh se j nasmela i rekla:

– Ni ni čudo aš na me j on mali Robi potrošil kabal belila. Kad san došla doma bilo mi j celu se noć prat i nikako se oprat. Sa srića da san videla vnuku kako zame onu okruglu vaticu pa to z kremun znimlje inače bi mi se dogodilo kod i bratu. Zvone j leh z vodun opral pa se j otr va šugaman, a ono šugaman, pokle i kušinelnica si popiturani. Zaspraven mi je to šminkanje teško padalo, huje mi j bilo leh ginekološki pregled. A kad su mi još zalipili one umjetne trepavice, to j bil vrhunac

Glavni animatori

Zlobinjari su bili i glavni animatori va karavane. Istina, imeli su oni svoj sponzorski auto i leh su se jedanput vozili buson, tek tuliko da vide i kako ta del festivala zgljeda, ma na domjenkimi su rad zakantali.

– Ča nećeš, ponese te atmosfera. Lipo smo se slagali z dečkimi z Klape Gromik, ma i z onimi »Soli«, pa povedeš, Dule se priključi, pa Gromičani i zapivamo si. Znaš ča ću ti reć – MIK je jedna vela familja, i to ne ona ka se svadi leh ona ka se voli i va koj saki pazi na sakoga, a Baša j jedan fin gospodin ki se to drži pod kontrolom, zaključil je Zvone.

Na nastupu, nagradami i plasmanu čestitali su njin mnogi, ma neki i nisu.

– Ja, tako j to va životu. Zbilja su nan čestitali i oni ke znamo i oni ke ne poznamo, ma nažalost, bilo j i toga da nan nisu čestitali oni od kih smo to očekivali. Zač? Ne znamo. Intanto se mi zahvaljujemo i šilicami z »Rija« kod i »Riju« aš nas je on obukal, onda i Kvarantaboksu Kundiću ki nan je dal on prelipi auto, još z natpisun na vratimi »Hajdemo draga po novi micubiši«, pa sin ljudin ki su za nas glasali kod i onimi ki su nan pljeskali, celoj karavane, a najveć Novomu listu. Ja, dakako i Domaćemu radiju. Intanto pu mene kad dojdeš doma prvo ča z vratih vidiš su nagradi z MIK-a, govori Zvone.

Zahvalili su se oni i svojimi doma ki su ih trpeli, a najviše svomu Aleniću, anjeliću ki ih je zel na MIK. Govore da njin je malo grdo sad kad ne kampanaju, ma da njin je već 19. sedmoga poć na Cres kade će malo zakantat, ma i pokazat dve serije z svoga serijala o narodnimi običajimi bakarskoga kraja koga već leto dan snima IRS art pod imenon »Jabuka«. Teta Zdenka je z Anun Brborun Hum dogovorila nastup va emisije »Svirci moji«, čeka ih još nekakov nastup na Gromišćine, a va planu njin je i izdat CD-e, samo da najdu sponzori. Ono ča njin je bilo delat isti dan je snimit »Jabuku« o MIK-u. Ča će to bit, strah nas je i pomislet. Ki j gljedal leh jednu »Jabuku« zna o čemu povedamo, a ki ni – ni ne zna ča j propustil. Tako iskreneh i pošteneh ljudi, a k tomu i puneh humora, retko kade se najde.

Smućene

– Ki put smo Zdenka i ja bile malo smućene. Recimo, ona j va Opatije poznopak obukla bluzu i tako obučena šla na domjenak, a ja san pak na Krku va brzine kad san otela prezut postoli, pozabila na jednu nogu pa san na domjenak došla va jednen plaven i jednen črnen. Ma, koga briga, smejuć se poveda teta Dragica koj je od Ibrice pas skoro bele, k tomu još i posujene rukavice skoro pojil.

Piše Slavica MRKIĆ MODRIĆ (NOVI LIST)